Senk (5) sans pwofesè yo.
1.
Mèsi zòrèy mwen !
Gras ak ou, mwen pa sispann tande
Tout kalite koze, tout lodyans sou 17 Me
Bel tèks powèt ak ekriven fè pwofesè ap boloze
Tankou m ta konprann pwofesè son gwo koze .
2.
Mèsi je m !
Gras ak ou, mwn wè san m pa pote vè
Tout konplis, tout atoufè wa latè
K ap jwe wòl papa bon kè, k ap simaye yon edikasyon pèpè
Yon bann raketè, yo tout se menm, mache fè gran dizè
Yon bann gwo Babin fin rich sou do mouche pwofesè.
3.
Mesi Nen m!
Gras ak ou, map respire toujou
Zorèy mwen mennen JE M jouk azouboutou
Pwofesè zèl nan do ou pa ta di son lougarou
Pa pè ni solèy ak pousyè, ni lapli ak labou
Pa jwnen pa vle di pa gen apeti ni bouch pa gou.
M pran sant yon edikasyon pèpè pou yon sosyete chawa
Yon bann je pete klere sou pouvwa se sèl wa , atò ki wa!
Yon bann akrekre, bèk anfè k ap kolonize lespwa
Si w pa gran Zouzounè , Zouzounèz , ou pa gen lavwa ni dwa
Bon pou la ou kite m ap pale ou pa di m sispann rablabla !
4.
Mèsi bouch mwen!
Gras ak ou mwen pa sispann pale
Pose kesyon, di Sa m panse e men m pwopoze
Troke lide nan lekòl ak Kominote
Brase lide ak APA je nan je pou sa chanje …
5.
Mesi Men m yo !
Gras ak ou , mwen pa sispann kole pyese tout sa m panse
Gras ak ou mwen pa sispann ekri, m fi n tounen wosiyòl nan chante
Ak 2 nawèm m vwayaje sou tout planèt la, mèsi lasyans!
Gras ak teknoloji mwen rankontre APA ki pa mezire konesans
Anseye Pou Ayiti pa sispann Chache Konnen
Ant bwa piwo ak grenn pwomennen
Kiyès ki pi konnen ak kiyès ki wè pi lwen .
Lanbi chanjman an sonnen
Zorèy revolisyonè yo kanpe nan tout kwen.
Avan vye kò a tchoule, souf la koupe
An n montre desten chimen
Ak 2 men n ann makonnen pou n fòje yon lòt demen.
Anseyan Lidè Luckson FLEURENCY,
Teknisyen nan pedagoji aktiv ak Lidèchip Transfòmasyonèl
Sou lidèchip Anseye pou Ayiti ( APA)
Super
RépondreSupprimer